{"id":1069,"date":"2022-07-31T09:21:10","date_gmt":"2022-07-31T08:21:10","guid":{"rendered":"https:\/\/www.cymorthcymru.org.uk\/housing-first-anglesey-awarded-housing-first-wales-accreditation\/"},"modified":"2023-07-19T09:45:04","modified_gmt":"2023-07-19T08:45:04","slug":"tai-yn-gyntaf-ynys-mon-yn-ennill-achrediad-tai-yn-gyntaf-cymru","status":"publish","type":"post","link":"https:\/\/www.cymorthcymru.org.uk\/cy\/tai-yn-gyntaf-ynys-mon-yn-ennill-achrediad-tai-yn-gyntaf-cymru\/","title":{"rendered":"Tai yn Gyntaf Ynys M\u00f4n yn ennill Achrediad Tai yn Gyntaf Cymru"},"content":{"rendered":"

Tai yn Gyntaf Ynys M\u00f4n, dan arweiniad The Wallich, yw\u2019r trydydd prosiect yng Nghymru i dderbyn Achrediad Tai yn Gyntaf Cymru.\u00a0Mae\u2019r achrediad \u2013 a gyhoeddwyd yn ffurfiol gan Julie James, y Gweinidog dros Newid Hinsawdd, yn ystod Cynhadledd ddiweddar Tai yn Gyntaf Cymru \u2013 yn dilyn misoedd o graffu trwyadl i werthuso pa mor agos mae\u2019r prosiect yn glynu at egwyddorion Tai yn Gyntaf Cymru.<\/p>\n

Mae Tai yn Gyntaf yn ddull o roi terfyn ar ddigartrefedd trwy ganolbwyntio ar adferiad; mae\u2019n ffocysu ar symud pobl ddigartref yn gyflym i mewn i gartref annibynnol, sefydlog, yn hytrach na mynnu bod pobl yn aros am amser hir mewn llety dros dro i brofi eu bod yn \u2018barod am d\u0177\u2019. Darperir cymorth dwys, aml-asiantaeth, heb unrhyw ragamodau na ffiniau amser.\u00a0Yn draddodiadol, mae\u2019r model wedi cael ei dargedu at bobl sy\u2019n cysgu ar y stryd neu mewn llety ymylol, a chanddynt anghenion cymorth cronig a chymhleth. Datblygwyd y model yn Efrog Newydd yn yr 1990au, yn bennaf gan y seicolegydd cymuned Sam Tsemberis, ac ers hynny mae wedi cael ei fabwysiadu\u2019n eang ledled yr Unol Daleithiau ac Ewrop.<\/p>\n

Er mwyn cael cymaint o effaith ag sy\u2019n bosibl, mae\u2019n holl bwysig bod prosiectau sy\u2019n eu galw eu hunain yn Tai yn Gyntaf, neu sy\u2019n honni eu bod yn cyflenwi\u2019r dull hwn, yn gwneud hynny\u2019n unol ag egwyddorion Tai yn Gyntaf.\u00a0Datblygwyd Achrediad Tai yn Gyntaf Cymru i werthuso a yw polis\u00efau\u2019n cael eu cyflenwi\u2019n unol ag egwyddorion Tai yn Gyntaf yng Nghymru ai peidio. Mae hi\u2019n broses hynod drwyadl sy\u2019n cynnwys craffu ar bolis\u00efau a gweithdrefnau\u2019r sefydliad, a chynnal cyfweliadau gyda thenantiaid Tai yn Gyntaf, staff, comisiynwyr, landlordiaid a sefydliadau partner.<\/p>\n

Dros y flwyddyn ddiwethaf, mae Tai yn Gyntaf Ynys M\u00f4n wedi arddel y broses hon ac ymateb yn hynod bositif i\u2019r adroddiad argymhellion interim, gan ymrwymo i ddatblygiadau a gwelliannau pellach. Cyflwynwyd yr adroddiad terfynol i banel o arbenigwyr annibynnol yn gynnar ym mis Gorffennaf; bu\u2019r panel yn craffu\u2019n ofalus ar y dystiolaeth, a daethpwyd i benderfyniad unfrydol i gyflwyno\u2019r achrediad i\u2019r prosiect hwn.<\/p>\n

Mae\u2019r adroddiad terfynol \u2013 sy\u2019n manylu ar y broses, canfyddiadau, tystiolaeth ac argymhellion \u2013 ar gael i\u2019w lawrlwytho yma<\/a>.<\/p>\n

Dywedodd Jo Parry, Rheolwr Prosiect Tai yn Gyntaf Ynys M\u00f4n:<\/strong><\/p>\n

\u201cRydyn ni ar ben ein digon wrth dderbyn achrediad Tai yn Gyntaf gan Cymorth Cymru.<\/p>\n

\u201cMae t\u00eem The Wallich wedi gweithio\u2019n hynod galed i gyflenwi gwasanaeth gwirioneddol wych, un rydyn ni i gyd yn falch ohono, ac ni allem fod wedi llwyddo heb gefnogaeth pawb oedd yn chwarae rhan yn y gwaith.\u00a0Moment y gallwn i gyd ymfalch\u00efo ynddi.\u201d<\/p>\n

Dywedodd Alex Osmond, Rheolwr Tai yn Gyntaf a Phrofiad Byw Cymorth Cymru:<\/strong><\/p>\n

\u201cMae gweithio gyda th\u00eem The Wallich yn Ynys M\u00f4n, ochr yn ochr \u00e2\u2019u sefydliadau a\u2019u cleientiaid partner, wedi bod yn brofiad rhagorol. Mae pawb sy\u2019n chwarae rhan yn amlwg yn gweithio\u2019n galed i sicrhau eu bod yn cyflenwi model Tai yn Gyntaf effeithiol, yn unol \u00e2\u2019r egwyddorion.<\/p>\n

\u201cMae yna ddiwylliant o adlewyrchu ac addysgu ar draws y sefydliad, a disgwyliaf weld prosiect Ynys M\u00f4n yn parhau i ddatblygu ei gymorth dros amser. Roedd y prosiect yn llwyr deilyngu\u2019r achrediad, a disgwyliaf y bydd y staff yn gweld y llwyddiant fel dechrau taith, ac nid y diwedd.\u201d<\/p>\n

Wrth siarad mewn cynhadledd Tai yn Gyntaf Cymorth Cymru a gynhaliwyd yn ddiweddar, dywedodd Julie James, y Gweinidog dros Newid Hinsawdd:<\/strong><\/p>\n

\u201cPleser o\u2019r mwyaf i mi yw cyhoeddi mai\u2019r trydydd prosiect i ennill achrediad Tai yn Gyntaf Cymru yw Tai yn Gyntaf Ynys M\u00f4n, dan arweiniad The Wallich ac mewn partneriaeth gyda Chyngor M\u00f4n, gwasanaethau iechyd lleol, cynrychiolwyr y gwasanaeth cyfiawnder troseddol, a nifer o landlordiaid preifat a chymdeithasol.<\/p>\n

\u201cWedi\u2019i sefydlu yn 2013, fel cynllun peilot i ddechrau, hwn yw\u2019r prosiect Tai yn Gyntaf mwyaf hirhoedlog yng Nghymru; mae wedi rhoi cymorth i gannoedd o bobl sy\u2019n cael profiad o ddigartrefedd, ac mae\u2019n braf clywed bod hyn yn cael ei ddarparu\u2019n unol ag egwyddorion Tai yn Gyntaf.<\/p>\n

\u201cRydw i wedi bod wrth fy modd yn clywed am y gwaith trylwyr a wnaed yn ystod y broses hon i wella a datblygu\u2019r gwasanaeth. Llongyfarchiadau i Tai yn Gyntaf Ynys M\u00f4n ac i Jo Parry, y rheolwr gwasanaeth.\u201d<\/p>\n

Gallwch weld y cyhoeddiad yma:<\/h3>\n